रावेरच्या सोनाली चौधरी चे पुणे येथील राज्यस्तरीय शालेय वेटलिफ्टिंग स्पर्धेत रौप्य पदक

मुक्ताई न्यूज नेटवर्क रावेर l

   क्रिडा व युवक सेवा संचालनालय महाराष्ट्र राज्य पुणे अंतर्गत तसेच महाराष्ट्र राज्य वेटलिफ्टिंग असोसिएशन च्या मान्यतेने महाराष्ट्र क्रीडा प्रबोधिनी बालेवाडी पुणे येथे आयोजित राज्यस्तरीय शालेय वेटलिफ्टिंग स्पर्धेत रावेरची खेळाडू कु. सोनाली राजेंद्र चौधरी हिने रौप्यपदक पटकावले आहे.

पुणे येथील म्हाळुंगे बालेवाडी येथील श्री. छत्रपती क्रीडा संकुल बॉक्सिंग हॉल मध्ये राज्यस्तरीय शालेय वेटलिफ्टिंग स्पर्धा घेण्यात आल्या. त्यात 19 वर्ष वय व 55 किलो वजन गटात रावेर शहरातील कु. सोनाली राजेंद्र चौधरी हिने 141 किलो वजन उचलून खेळाडू 2024-25 यावर्षीचे राज्यस्तरीय रौप्य पदक पटकावले.

सोनाली हि रावेर शहरातील सावदा रोड वरील रहिवासी माजी सैनिक व सध्या रावेर स्टेट बँकेचे सुरक्षा रक्षक तसेच श्री. रोकडा हनुमान व्यायाम शाळेचे सदस्य राजेंद्र रामदास चौधरी यांची मुलगी असून यशवंत विद्यालय व कनिष्ठ महाविद्यालय रावेर ची विद्यार्थिनी आहे. 

तिच्या या कामगिरी मुळे रावेरचे नाव राज्यात झळकले आहे.